06/09/2026
⚽⚽⚽⚽⚽⚽⚽
სწორედ ამდენი გოლი გავუტანეთ DJK Fasangarten-ს!
მატჩი ჩვენი სრული სათამაშო უპირატესობით დაიწყო და ასეც დასრულდა. უკეთეს სცენარზე ოცნებაც კი გაგვიჭირდებოდა: დომინაცია ანგარიშშიც ავსახეთ და მეტოქე 7:1 დავამარცხეთ.
⚽⚽ 10-ე და 38-ე წუთებზე ჩვენმა ერთადერთმა ლეგიონერმა, სერგიმ, დუბლი შეასრულა, პირველად როყვას იდეალურ გადაცემას გამოეხმაურა, ხოლო მეორედ როყვას მიერვე ჩაწოდებულ ჯარიმას მოჰყვა არეულობა მეტოქის საჯარიმოში.
⚽ ამ გოლებს შორის თავი გიორგი ჩილინგარაშვილმაც გამოიჩინა, რომელმაც ვიტალის პასის შემდეგ ინდივიდუალური ოსტატობით აუარა გვერდი მცველებს და ბურთი ბადეში მოათავსა.
პირველ ტაიმში გატანილი 3 გოლის შემდეგ ბიჭებმა ვიგრძენით, რომ ეს ჩვენი დღე იყო და მეორე ნახევარშიც მაღალი ინტენსივობა შევინარჩუნეთ.
⚽⚽ მალევე, სერგისთან ერთად მატჩის ალბათ საუკეთესო მოთამაშემ, გიორგი ფარჯიანმა, ზუსტად თავზე დაასვა ბურთი თოფურიას, რომელმაც ჰაერში ყველას აჯობა - 4:0! გიომ შემდეგი და ამავდროულად სადებიუტო გოლი აფხაზავასაც გაატანინა, როდესაც იდეალურად გახსნილი რეზო ფლანგური ჩაწოდებით მოამარაგა.
⚽ დიდი უსამართლობა იქნებოდა, ფარჯიანს მოედანი გოლის გარეშე რომ დაეტოვებინა: შესანიშნავი ცრუ მოძრაობები და 6:0.
⚽ ბოლოს კი ხარაძემაც თქვა თავისი სიტყვა - ბექამ შორეული დარტყმით აიღო მეტოქის კარი. მანამდე ერთი გოლი ჩვენც გავშვით და საბოლოო ანგარიში - 7:1 დაფიქსირდა.
გოლებისა და საგოლე პასების ავტორების გარდა, თექვსმეტივე ფეხბურთელმა გამორჩეულად ითამაშა: კაპიტანი ლომინაძე, ვეტერანები - დიმა და გიზო, დაუღალავი აკო, შეცვლაზე შესანიშნავად შემოსული ანრი, ხუჭუჭა და ზვიადი, ლუკა თავისი ელეგანტური თამაშით და თითქმის უსაქმოდ დარჩენილი მეკარე შოთა.
განსაკუთრებული მადლობა ჩვენს გულშემატკივრებს, რომელთა მხარდაჭერაც დამატებით მოტივაციას გვმატებს. ასევე, დიდი მადლობა ვალერი გიორგაძეს გვერდში დგომისა და კარგი ადამიანობისთვის!
მადლობა მეტოქეს, რომელიც ანგარიშის მიუხედავად მატჩის ბოლომდე იცავდა სამართლიანი თამაშის პრინციპებს.
შემადგენლობა: ნემსიწვერიძე, აივაზიდისი, როყვა, ლომინაძე, ფარჯიანი, გვენეტაძე, თოფურია, პოლუეკტოვი, დავითაშვილი, ჩილინგარაშვილი, ხარაძე.
სათადარიგო: გიორგაძე, ფენერსკი, ნაჭყებია, მიქავა, გოგოლაძე, აფხაზავა.
