24/08/2026
Unseri Teams starte mit drei Sieg us vier Spiel in die neui Saison.
🖤💚🖤💚🖤💚🖤💚🖤💚🖤💚🖤💚🖤💚
De Uftakt in die neui Spielzyt hän am Frytig Zobe unseri 40+ Sene in Eike gmacht. Nach ere asprächende Leischtig im Teschtspiel gege de FC Birsfälde, ischs Team die Ufgob, unter de Leitig vo de neue Trainer Beni und Martin, mit viel Sälbschtvertraue agange. D Goal vom Nuno (×2), Mägge, Ronnie und Hazem händs de Defensive erlaubt e bits öpis zuezlo.
FC Eiken (40+) - VSF (40+) 3:5
De Safet het als neue Trainer vo unserne 30+ Sene in kurzer Zyt einigi Neuzuegang z integriere gha. Nach guete Teschtspielleischtige isch me sehr zueversichtlich ins Derby gege de SC Basel-Nord gstartet. Leider hän aber d Goal vom Adi (×2) und em Cem diesmol nit zum Sieg glängt.
SC Basel-Nord (30+) - VSF (30+) 6:3
Nach 2 Mönät intensiver Vorbereitig ischs entlich sowit gsii, unseri 2ti isch uswärts ufem St.jakob gege de FC Blue Birds in die neui Saison gstartet.
Obwohl d Vorbereitig ufe Match nid optimal gsii isch, het me s Spiel vo Afang ah im Griff gha, und au direkt ide 6te Minute chõne s 0:1 erziele, Torschütz isch unseri nummer 6, Basil Bretscher
Au dennoch het mes s Spiel sehr guet im Griff gha, bis ide 35te wiedr de Basil im Strofrum zum Ball het wele und nur miteme Foul het chöne gstopt werde, de fälligi Penalty versenkt de Andrea sehr souverän🙏
Kurz vor de Pause het de eigentlichi Trainer wo hüt het miese zwüsche de Pfoste ushelfe, doch no miese igriffe und verhinderet de Aschlusstreffer mitere starke 1vs1 Situation.
Au noch de pause het me s Spiel grossteils im Griff gha, nur ade Effizienz hets gmanglet, susch wär de Sieg no einiges höher usgfalle. Schlussentlich isches bim 0:2 bliebe, e starke und sehr verdiente Sieg fürs 2 im Uftaktspiel zur Mission Ufstiegsrundi! Die 2ti freut sich uf die nächste Spiel und isch heiss druf, no me z zeige, zu was sie fähig isch 💚Allez Grien💚
FC Blue Birds - VSFb 0:2
S Team VSFa het am Sunntig de Abschluss vo däre Spielrundi z bestritte gha. Uf em Bachgrabe isch me vom letschtjöhrige Tabällenochber FC Schwarz-Wiess empfange worde. Dämentsprächend hän d Zuschauer e ängi Affiche dörfe erwarte. Nach em unglückliche usscheide im Baslercup gege de 3. Ligischt AC Rossoneri, hets d Mannschaft um die neue Trainer Cem und Nils diesmol wölle besser mache. Trotz einige verletzigsbedingte Abweseheite und ere schmal bsetzte Ersatzbank, isch jede bereit gsi alles zge. Durch d Goal vom Dome und em Louis isch me mit ere souveräne 2:0 Fiehrig in d Pause. E Durchbruch vom Louis in die gegnerischi Box het kurz nach Wiederapfiff nur durch e Foul könne gstoppt wärde, was zur Vorentscheidig durch de vom Guti versänkti Penalty gfiehrt het. Durch dä Träffer schienbar mit viel Sälbschtvertraue verseh, het denn wiederum de Guti de nögscht Ball us 25 m diräkt abgno und zum schönschte Goal vom Spiel könne inetze. Doch au nach däre Erhöhig vom Score het s Team, in de Person vom Dome, nonig gnueg gha. Mit zwei wietere Goal het är si Hatrick könne komplettiere und die drei Pünggt für unseri Farbe ändgültig sichere.
FC Schwarz-Weiss - VSFa 0:6
🖤💚🖤💚🖤💚🖤💚🖤💚🖤💚🖤💚🖤💚
Die zweiti Maischterschaftssrundi verspricht vorallem am nögschte Samschtig e Fanfründliche Tag. Uf em Landauer bestoht d Möglichkeit nachenander unseri beide Seneteams z supporte.
Am Sunntig mien ihr Euch leider für ei Spiel entscheide. So trätte die beide Aktivteams gliechzytig uf em Bachgrabe und em Landauer gege ihri Gegner a.
Über Euri zahlriechi Unterstützig vor Ort würde mr uns sehr freue.
29.08./13.00: Landauer
VSF (40+) - FC Möhlin-Riburg/Acli (40+)
29.08./15.00: Landauer
VSF (30+) - FC Bosna (30+)
30.08./13.00: Bachgraben
FC Telegraph - VSFa
30.08./13.00: Landauer
VSFb - FC Ferad
🖤💚🖤💚🖤💚🖤💚🖤💚🖤💚🖤💚🖤💚
"VSF Basel-em Fuessball verpflichtet"
VSF Supporter:
Kraftwärkkurve
Kommando Landauer
🖤💚🖤💚🖤💚🖤💚🖤💚🖤💚🖤💚🖤💚
